Aşgabat şäherinde geçirilen hokkeý boýunça halkara ýaryş «Galkanyň» ýeňşi bilen tamamlandy. Bir hepde dowam eden ýaryşyň oýunlary Gyşky oýunlar sport toplumynda geçirildi.
Final oýnunda «Galkanyň» oýunçylary Russiýa Federasiýasynyň Tatarystan Respublikasynyň «ADIHIC-Kazan» toparyny ýeňlişe sezewar edip, altyn medala eýe boldylar. Oýun 4:2 hasabynda türkmen toparynyň peýdasyna tamamlandy.
Şeýle-de ýaryşyň eminlerine we şowly çykyş eden oýunçylara ýörite baýraklar gowşuryldy. Has takygy, Ýaroslaw Lagun («Wolat») «iň gowy derwezeçi», Musa Annasaparow («Galkan») «iň gowy goragçy» hem-de Aýdar Miftahow («ADIHIC-Kazan») «iň gowy hüjümçi» diýlip ykrar edildi.
Hokkeý boýunça halkara ýaryş 15 – 20-nj aprel aralygynda Gyşky oýunlar sport toplumynyň iki sany buz meýdançasynda bolup geçdi. Oňa Bahreýnden, Belarussiýadan, Eýrandan, Gazagystandan, Gyrgyzystandan, Omandan, Russiýadan, Özbegistandan, Türkiýeden hem-de ýerli toparlar gatnaşdylar.
Türkmenistanyň Prezidenti Serdar Berdimuhamedowyň gol çeken Permany bilen, Içeri işler ministrliginiň «Galkan» hokkeý toparynyň tälimçilerine we Söwda we daşary ykdysady aragatnaşyklar ministrliginiň “Şir” hokkeý toparynyň tälimçisine we türgenlerine hormatly atlar dakyldy.
Klubymyzyň toparyň başlygy-baş tälimçiniň kömekçisi Ilýas Weliýewe «Türkmenistanyň at gazanan tälimçisi», toparyň türgenleri Esenow Öwezguly, Taňňyýew Gurbanmyrat dagylara bolsa «Türkmenistanyň at gazanan sport ussady» diýen atlar berildi.